Sama Jobe
Ngemuva kwezigameko eziningi zokudilizwa kwezindlu endaweni yase-Azania e-Cator Manor nase-Ekuphumeleleni e-Marianhill, inhlangano Abahlali baseMjondolo banikele enkantolo ephakeme yaseThekwini ngoLwesihlanu, ukuyofaka isicelo sencwadi yokuvimbela uMasipala ukuba udilize izindlu ngalesikhathi se-Lockdown.
Onogada bakwa-Calvin Security okuyibo abenza umsebenzi wokudiliza izindlu ngokusebenzisana noMasipala. Isithombe sithunyelwe.
Kuleli sonto ngoMsombuluko, Abahlali baseMjondolo babhekane noMasipala eziqwini zamehlo enkantolo. INkosi yenkantolo, u-Judge Moodley, ucele ukuba izinhlaka zombili zithole isisombululo kuloludaba ngaphandle kwenkantolo.
Esitatimendeni esikhishwe nguMasipala ngoLwesibili, iMeya yeTheku, uMnuz Mxolisi Kaunda, uthe kubuhlungu ukuthi kukhona abasebenzisa lesikhathi ukuphula umthetho kuhlanganisa nokudla umhlaba ngokungemthetho.
"Kubuhlungu ukuthi ngalesikhathi esibhekene naso, kunamaqembu emiphakathini yethu aphula umthetho kuhlanganisa nokudla umhlaba ngokungemthetho. SinguMasipala onakekelayo, sesikwazile ukunikezela ngezindawo zokuhlala ebantwini abangaphezulu kuka-4000. Senza nesiqiniseko sokunakekela abasemjondolo, emahostela nasezindaweni zokuhlala zesikhashana ukuze bavikeleke kwigciwane I-Covid 19. Kungani-ke singadiliza izindlu ezihlala abantu abazidingayo? Izindlu ezidiliziwe bezisanda kwakhiwa futhi zingahlali muntu, " kusho uKaunda.
IMeya yeTheku uMnuz Mxolisi Kaunda. Isithombe: https://www.power987.co.za/wp-content/uploads/2019/08/Mxolisi-Kaunda.jpg
Esitatimendeni esikhishwe inhlangano Abahlali baseMjondolo ngoLwesibili, sithi njengoba bekade bekhipha izitatimende, kubikwa nasezindabeni ngodlame obelwenzeka luphindelela e-Azania nase-Ekuphumeleleni, obekwenzeka ngaphandle kwencwadi evela enkantolo egunyaza ukuba kudilizwe izindlu. Kuphoqwa nabahlali ukuba basuse izithombe nama-Video angubufakazi bodlame komakhalekhukhwini.
Enye yezindlu ezadilizwa Ekuphumeleleni. Isithombe sithunyelwe.
Siqhubeka sithi kukaningi uMasipala udiliza izindlu zabahlali ngale kwencwadi ebagunyazayo. Kulesi sitatimende kuyavela ukuba emva kokuba becelwe ukuthi baluxazulule ngaphandle kwenkantolo loludaba, bacele ukuba uMasipala ubavumele bayovusa izindlu zabo kodwa abakaMasipala banqaba, bathembisa ukubahlinzeka ngezindawo zokuhlala eziyisikhashana.
UMnuz Mqapheli Bonono, okhulumela inhlangano Abahlali baseMjondolo, uthi abahlali banezizathu zokunqaba ukuya kulezi zindawo.
UMnuz Mqapheli Bonono khulumela inhlangano Abahlali baseMjondolo. Isithombe sithunyelwe.
"Okokuqala nje abantu abanaso isiqiniseko sokuba bazovunyelwa ukubuyela ezindaweni zabo emva kwalezinsuku ezingu-21 zokuvalwa kwezwe. Lezi zindawo abahlala kuzo zingamakhaya wabo, aseduze nasemisebenzini yabo kanye nasezikoleni okufunda kuzo izingane zabo," kuchaza uBonono.
Khona manjalo, ngoLwesine ebusuku umengameli uCyril Ramaphosa, umemezele ukuthi uhlelo lwe-Lockdown luzokwengezwa ngamasonto amabili njengoba bekulindeleke ukuba izwe libuyele esimeni esejwayelekile ngomhlaka-17 kulenyanga.
